2019就完喇

2019係好有為嘅一年，係好考驗耐性嘅一年，亦係好考驗堅忍嘅一年，繼續提醒我要擴闊自己嘅眼界，擴闊自己嘅極限，有啲事少我一個好少，多我一個好多，唔好乜都話on9冇錢唔關我事唔去諗唔去試唔去做。

如果要搵一首廣東歌，去描繪今年嘅我，我會揀許廷鏗嘅《青春頌》
https://www.youtube.com/watch?v=NPa2FCTqd3g

2020一開始就要打大佬，開始。

生命

昨晚收到外婆告急的消息，立刻撲過醫院，醫生叫我地再一次有心理準備，一留就留到凌晨三點，我係咁咳，我撤退先，訓一陣就輪到我入醫院，出返嚟再去另一間醫院繼續留守。

睡眠

有人提醒我其實睡眠不足，我一直都知，我都好感謝有人提點我一啲生活上嘅習慣，我係一個集中力差嘅人，你要我為一個慢性嘅目標，例如早睡早起身體好，而訂立一個持之以久嘅睡眠習慣，一個差佬打到嚟都唔改嘅習慣，其實係唔可能。所以，我真係好多謝佢，我昨日訓咗10個鐘，今日條氣管係好咗好多。咁所以，我今晚都係早啲訓，功課就聽日再繼續~

盲目

經驗係留嚟話畀我地知，有啲情況會瀨嘢，同埋點樣先唔會瀨嘢，如果一收到個task就係咁催眠自己話「好易啫」或者「應該做唔到」或者「嘩，好煩喎」，好簡單唔睇details就下咗定論，咁就白白浪費咗之前累積嘅經驗。要做嘅嘢，就要做咗佢，易嘅要做，難嘅要做，講句「好易」「好難」係講嚟做咩嘅呢？有種就直接講點做，講講下，分分鐘好易變好難，或者好難嘅嘢其實好易。

《返校》的確可以套晒落香港而家嘅狀況，典型敵托邦嘅狀態，政權同警察全盤否定人性同人嘅尊嚴，我地要留返條命，永不忘記，將我地所見所知，流傳下去。

單一

一日我未做完份功課，一日我嘅生活都係好單調，唔可以好放咁去玩啲新嘢，睇嚟我真係要有人扶我一把。

呢排啲topic真係好單一，好在呢個blog冇人睇。

清醒

今日少咗一份浮燥，可以細心感受每一樣嘢，令想像回復返佢嘅無限性。

應承我，做以下呢幾樣嘢：

1) 你個仆街，仲唔做功課？
2) 做功課呀！
3) 仲唔做功課？

單車

我係咪應該買一架單車？落街食嘢，買日用品，出沙田，其實可以變得好簡單。

呢排出血量開始減少，個康復速度比上次快好多，果然做gym係有用嘅。做咗個檢查剪走一啲組織抖氣係好咗嘅，而家可以跟住spotify唱晒成首歌。所以，我對下一次真正嘅手術充滿期望。

搵到一隻喇

真係厲害，喺某人嘅帶領下，喺信和搵到《起勢搖滾》，反而搵唔到杜汶澤嗰套，係感到有啲意外。下一步，就係挖返部PS3出嚟播碟。

突然醒起星期一好似有啲公司嘢係一定要做，唔做就人頭落地，不如都係星期日做咗佢。

究竟星期一我嘅身體狀況食唔食到千賀水產呢？當得先啦，當日個流程應該係朝早飲杯奶茶，然後晏晝買個包加盒奶，夜晚就係咁食食食！

人生總有些高山低谷，最重要係任何時候都可以企返起身。

如常上班

今朝外科再打嚟話下年年頭再做一次手術，話支架末端突咗啲肉出嚟，導致氣管收窄，可以過農曆年前搞搞佢，我即刻lur飯應啦，有得搞一搞，我起碼可以正正常常活多三四年。

昨日有六位病友(即係圍住我訓嗰五張床)，全部都係舊症，即係都已經知自己出咗事，而且全部都做過相同手術，大家都係同路人，大家都大概知對方係點生活，大家都處之泰然，大家都睇落唔似有病。所以話，其實醫學真係好昌明。

想搵2012《起勢搖滾》同《DIVA華麗之後》，前者可能真係要慢慢搵...

要快啲的起心肝做最後嗰份assignment喇。

禁食

仲有一分鐘就唔畀食嘢飲水，即刻飲枝500ml Coke zero先。

同事知我最近讀緊數，所以問咗我一題小二嘅數學題：

6 + 2 + 4 = 122432
5 + 3 + 8 = 154053
7 + 2 + 5 = 143547
3 + 6 + 9 = 182742
8 + 2 + 5 = 1640??

大家都未知真正嘅答案，而基於我搵到嘅pattern，「??」應該係52。

考完喇！

拿，個sem未完，仲有一份功課要交，而且係冇教過，要自己睇片睇notes睇tutorial，有成三個chapter，換算返即係有九個鐘堂要上返，不過唔緊要啦，來日方長，仲有14日先交~

個試當然冇A Level咁難，範圍亦都唔算闊，但準備過程令我回憶起考A Level嗰種緊張，因為A Level要考個A返嚟，係要對呢一科有好深刻嘅體會，唔單止剩係知道晒成個syllabus嘅嘢，而係對整個學科有一番「洞見」，有一個基於呢科嘅「世界觀」，用呢科嘅嘢描述個世界。起碼science係咁啦，中英文唔好問我有咩世界觀，合格已經要開喇叭慶祝。

可能真係可以趁假期出去玩？睇定啲先啦。

一考完試，我就喺youtube搵啲基本樂理課程嚟睇，音樂同藝術從古之今都係我弱項，我試下有冇得克服下先。

錢

今日趁lunch入票交租，去中銀分行，連奧海城嗰間都圍晒板，都知個形勢係幾嚴峻，一入到去見到個哥哥仔開晒蓋reset緊部入票機，仆街，咁排住櫃台先，經理仲話可能要晏晝兩點先reset得完，掃緊人落大角咀分行話有票箱，我斜視咗哥仔個電腦，條progress bar都65%，咁我都係堅持等，好在都唔洗半個鐘就有得用。

今年敝公司咁嘅業績，bonus同人工都係唔洗諗。

今日見某間中原地產將最大個舖位吉返出嚟，就知又係時候cash is king。

如果星期四大吉利是，可能又要預一球出嚟。

甩喇

都話咗會甩post架啦~ 考完第一科真係放鬆咗好多，好享受星期六無所事事咁過，加埋訓咗14個鐘，星期日凌晨再接力訓多11個鐘。唉，聽日要返工。

考埋下星期二，咁就叫做過咗啲大關口，當然，星期四入院做氣管鏡先係最大嘅關口，氣管鏡係用碌嘢經鼻腔塞落個氣管，中途會掂到無數超敏感嘅細胞，企圖咳返碌嘢出嚟，醫生會叫你全程「忍住呀，唔好咳」，間中會讚你「好叻呀，就得架喇」，成個過程都係血濃痰，支鏡會影低晒氣管嘅狀況，遇到啲有趣嘅組織，會咬走一忽做活檢，跟住你嚟緊一個禮拜都會咳血，直至個傷口埋口，支鏡經過嘅組織位置都會腫晒。

中間會係咁噴液態麻醉藥，同灌水入你氣管一樣，我未試過浸親，但我好肯定浸親就係呢種感覺。

星期五究竟返唔返到工架...

仲有三個鐘就開考，有啲興奮

對上一次考試好似係PMP，同今次一樣，都係pass/fail grading(哈哈~)，所以真係唔特別緊張。

旅行

「旅行」同「渡假」呢兩個term我係分得好清楚的

「旅行」係你好想去當地見識下，有啲特定事要做，係會願意花時間去計劃；而「渡假」就係hea，你會揀啲用嚟嘆世界嘅配套，價錢唔係太重要，最緊要係令自己「回到氣」，你只會隨機揀啲人云亦云嘅景點，一日只會去一個地方，而且攰得滯就即刻cut咗佢，坐低食嘢然後返酒店繼續hea。

用以上嘅定義，我都好耐冇試過去「旅行」了，但「渡假」就真係去過唔少，節奏上我覺得每三個月就出一出去渡假就岩，但而家孭住個master，我又唔會走堂嘅，所以都唔係話去就去，所以都係睇情況啦。

果然斬纜，係我今年學到嘅嘢，送畀大家Mag BB嘅《玫瑰式體驗》https://www.youtube.com/watch?v=Pos7xWGE2j4

有少少唔想盡力的感覺

呢個係壞習慣，覺得自己已經係做到最好，但明明都未諾貝爾獎，即係仲有龐大嘅進步空間。我係有啲on9嘅完美主義份子，on9嘅地方在於我只係take完美主義嘅subset，我會勇於承認自己有改善空間，但take action就遲下先。

喂，唔係講笑架喎，本嘢買咗成千幾蚊，就算考完試我都一定會睇晒佢。

唉，個printer啲墨炒晒粉，要搵人幫手print份answer book...

再搵地方住

其實而家住緊嗰度最大問題係難搵食，以前一落街就茶餐廳老麥，而家一落街係乜都冇，大概要行8分鐘先去到附近商場，所以下年3月中完死約前都要研究下搬去邊。話就話租金回落，但次次回落得嘅都係溶溶爛爛唔住得人嘅單位，所以呢啲新聞聽嚟係冇意思，我自己就希望可以用同一個價錢，租返個大少少嘅單位(~400呎)。

同考A-Level一樣，越近考試就越唔想溫書，嗰種感覺似係有人監住你去做自己鍾意做嘅嘢，我比較鍾意喺我自己鍾意嘅嘢上，訂目標畀自己去完成。有個同事話嗰啲遙距master programme先岩我地呢個年紀嘅節奏，都不無道理，人越大，就越有更多事要處理，呢個時候，flexibility原來係咁有價值。

星期五考完第一個試，不如洗洗個隔塵網。

無間學習

我有臨訓睇Youtube片嘅習慣，係有個支架吊起個iPad咁睇，想快啲快就睇啲悶片，仲有精神嘅話，就會睇啲online lecture series，睇到自然訓著。

近排我睇緊一個我個人好欣賞嘅youtube片系列：MIT opencourseware裡面嘅《Quantum Physics I》，呢個係第一條片：

https://www.youtube.com/watch?v=lZ3bPUKo5zc

截至今朝早，我睇完頭六條片，MIT果然係MIT，個lecturer個教書技巧真係好好，節奏、舖排、互動、gag位，笑容，全部都好吸引，我諗緊如果比著係我教會點呢？會唔會教到好似某啲人把聲咁勁flat勁悶勁想訓？會唔會全程黑口黑面？如果我要做，咁我個目標就係要達到呢位professor嘅水平。

應承自己嘅嘢(下半部)

拿，就咁嘅，我就沖咗涼喇，咁第(4)點無謂啦，唔通再沖過涼咩~

無可否認，呢種cardio係要跨越一啲心理障礙嘅，因為真係好辛苦，同埋驚又搞到個肺同支氣管。

今日都叫做操熟咗用R，做SLR、MLR、ANOVA、forward selection同backward elimination都叫做過幾次，係冇做stepwise，但我估OK掛，仲有成科foundation stat未溫過......

報讀呢個master其實同寫呢個blog一樣，都係一種make commitment嘅象徵，只不過呢個programme好似好chur，但無論如何，兵來將擋水來土淹。

聖誕期間仲有份功課要做，仲要係冇教到(one-way同two-way classification)，要自己睇professor嘅片，但呢part唔識就不如讀屎片，所以我諗，有冇可能聖誕去個trip，然後夜晚返酒店時睇片順手做埋份功課呢？

應承自己嘅嘢(上半部)

我今日8:20am先起身，9:40am返到中大溫variable selection同model selection，溫到2pm就收檔。不完美，有改善空間。

節奏係好緊要，我覺得一個好嘅計劃遠不如一個好嘅節奏，無緣無故嘅chur係冇意思，你可能一直都犧牲緊另一啲嘢，而令眼前嘅嘢做快咗。

而家清埋堆體能鍛鍊先，今晚應該會再出一篇文，為今日做個總結。

不如每日都寫一篇文，好似得

今日唔記得喺邊睇到一幅圖，大致上係比較成功嘅人同失敗嘅人，心態、思考同習慣上有咩唔同，其中一樣係「堅持寫日記」，呢個point突然間好有feel，因為寫日記好似幫我解決到兩個問題：

1. 成日唔記得自己想做乜
2. 成日唔記得自己想做成點

其實同平時寫epic/story/task一樣，寫description同acceptance criteria咁咋嘛。

不如咁，由今日起到年底12月31日，我每日出一篇，mark返低我要做乜，做到咩程度，同有冇做到啦。

我想做嘅包括：

1. 八點起身食嘢
2. 九點半開始溫書 (返中大又好，返自修室又好)
3. 每日起碼花30分鐘做resistence
4. 每日花10分鐘做超chur嘅cardio，冇錯，踎低起身拋豆袋，HR冇150就當冇做過