不確定性

我打過一份令我開竅嘅工，我老細同我講過：「做management就係每日都面對好多uncertainty，但仍然做出正確嘅決策。」，呢句嘢我一隻都記起心裡面，成為我平時剖析處境嘅原則。有啲嘢你永遠不可知，又或者你冇足夠時間或資源去搞清楚，呢個時候，你千祈唔好用自己嘅經驗去估，100個人，會有100個估法，或者我畀100日時間你，你分分鐘鐘都日日都有唔同嘅見解。

你唯有真真正正建立一個思考方法嘅框架，結合搜集資料嘅能力、查證嘅能力、推理嘅能力，再加上追求真相同完美嘅態度，咁先可以強化自己，並且感染身邊嘅人。一個問題，可以有好多個答案，但perfect嘅答案只有一個，人嘅目標就係要不斷追求呢個perfect嘅答案，就算追唔到，都要知點解追唔到，以及砌一個最接近完美嘅答案。

如果真係好趕急要做決定，咁我只能話，做一個唔完美但符合邏輯嘅決定，係永遠好過企喺原地乜都唔做。某程度上，好多uncertainty，你肯行出第一步去搏下，個世界自然會講多啲嘢畀你聽。

作反了

你條仆街又成個星期冇出blog，旨意你做嘢就死得啦。

今日買咗兩條褲同四對襪，總算唔洗爛身爛勢，好感謝兩位好友陪咗我成個下晝。

今晚又開咗公司電腦，見到啲code真係隔離飯都嘔出嚟，即刻冇mood，返返去打下機。

病了

昨晚頭痛、發冷、發燒、手腳無力，應該係中咗招，好在訓一訓，又冇乜嘢，呢啲有潛伏期嘅病真係好陰濕。

畀著係過緊以前嘅生活，我可能要直入威爾斯了。

開始holiday mood了，想打機，想訓覺，乜都唔想做。

電影

一口氣睇晒《起勢搖滾》同《DIVA華麗之后》，再加上CTS打嚟話31號有得做手術，心情靚晒。

本身對《起勢搖滾》冇乜期望，因為成套嘢嘅演員都係班音樂人，而唔係專業演員，但我都好feel到佢地嗰種經濟環境嘅掙扎同屋企人對自己嘅期望帶嚟嘅壓迫，可能套嘢真係太多人，角色描寫刻劃都唔深刻，林德信離世嗰幕其實唔係好觸動到情感。

《DIVA華麗之后》就犀利喇，老實講，而家睇返呢套戲，真係好容祖兒嘅味道，每句對白每個場境，都似係容祖兒嘅親身經歷。杜汶澤就更加唔洗講，抵佢攞獎，根本就係靠佢演活經理人呢個角色而撐起成套戲。林欣彤個表現我覺得同容祖兒差唔多，都係一個歌手去拍戲嘅表現，而同樣我好感受到佢都係演緊自己，面對生活圈子嘅轉移嘅，唔單止佢自己一個，而佢身邊最愛嗰個都會感受到呢個轉變，陳家樂只可以揀放棄，或者係背後無條件支持阿red。

呢個政治環境，係好需要呢啲文藝片去調劑下生活。

又甩

呢排真係冇咩心情，足足隔咗成個禮拜先出到呢篇嘢。

係好失落下，以為可以告一段落，但點知有啲嘢係自己同好多人安排好晒，但最後都可以取消咗，而且你唔知下一次機會係幾時。個情況有啲似我之前炒車上庭，落口供同上庭冇乜嘢，收到封信claim你錢都冇乜嘢，係等上庭中間嗰八個月先係最難捱，而今次你甚至唔知要等幾多個月。

呢幾日個身體係好返啲，之前應該又係肺炎塞咗個肺，而家起碼叫咳到啲痰出嚟，每晚都要長開抽濕機，製造一個乾燥嘅環境嚟訓。

讀書啲嘢唔講喇，總之啲嘢撞晒期，仲要冇得揀局住要走堂。

我一直都畀啲「要堅強」「要撐住」「咁大個人咁都頂唔順？」呢類說話蒙蔽住，我而家好肯定咁講，呢啲激將性鼓勵對我冇用架喇，已經睇穿咗講呢句嘢嘅人嘅意圖，唔想對住我嘅，其實我可以走先，千祈唔好勉強留我。

無法集中

其實我一向都集中力低，但呢排真係想射下波。

RIP

1925 - 2020

病病地

昨晚咳咗一大篤痰後，我懷疑有少少發燒，一起身嗰下都係有啲頭暈，但好在而家又冇乜事，今日補充咗啲維他命C、普洱茶、飯之類，一嚟我知我積落一堆菌，二嚟我食唔夠碳水，但又繼續操，搞到作病。

好似好耐冇放工後寫code同讀書，我希望農曆年後可以的起心肝，話晒都真係要開學了。

臨搬屋前想用硬卡紙嵌啲傢俬模型出嚟，方便我諗第時新屋點擺

健步行

開咗公司條手帶嚟玩，同埋用咗威爾斯畀我嘅計步器，由威爾斯返石門已經2200步，難怪啲人可以平均行到15000步。

等我都試下每晚來回行6km睇下會點先，同埋物理治療嗰堆早操都幾有趣嘅，可以每日做下，都唔係，而家係強制要做，威爾斯有張紙叫我填每日做咗幾多...

休息過後

今日喺威爾斯等睇醫生等咗接近四個鐘，真係多人到爆，睇個勢，我遲下訓威爾斯嗰陣真係會遇著WARS。

今日特登買咗啲清潔劑，靜候抹地嘅衝動來臨。

要開始對音樂有commitment，快啲買個琴返嚟先，長遠嚟講，我想向作曲編曲嘅方向進發，而今年嘅目標係先接觸樂理同鋼琴。快啲搬去啲四百幾呎嘅單位啦，要擺琴呀。

為咗達到63kg呢個目標，早餐同晚餐都會有啲特別，我做啲實驗試下先。

緊湊的一星期

繼續休息之日，勁呀，個肺全日冇塞，可能之前真係輕微肺炎，不過以我而家嘅新陳代謝率，呢啲濕碎嘢靠食同訓就搞掂啦。

嚟緊四日都會喺醫院出出入入，但全部都係半日做晒，可能剩低時間探下外婆，或者返下中大。SARS都冇得話驚唔驚架喇，衞生啲，多飲水同休息咯，我遲下要喺威爾斯訓添，邊有得驚咁多。

我希望今年可以：

1) 學樂理，同學彈琴
2) 更深入咁用python做日常嘢
3) 比啲心機溫書啦仆街
4) 成功挑戰公司個healthiest human挑戰
5) 落去63kg (i.e. 減6kg)

充足休息

昨晚個肺塞咗，勁辛苦，全晚食過嘅嘢全部嘔晒出嚟，好在最後係咳到篤痰出嚟，然後好安詳咁訓咗。到咗今日，我五點半放工，返到屋企食咗條fruit bar，飲咗啲石榴汁，即訓，個肺冇塞到。

我唔知我嘅睡債爭落有幾多，我淨係知我要訓多啲。

有同事開始帶嗰條virgin pulse手環，我都心思思想開始帶，但一帶就會畀人知道我冇去跑步~

聽日終於有時間去剪走個柒頭了。